Bráir af gúrkutíðinni?

Eftir marga daga af ekki nokkrum fréttum er hreinlega allt að gerast í dag. Eða svona þannig. Í fyrsta lagi er rifrildið hjá hjónunum í næstu íbúð við okkur að ná nýjum hæðum. Eftir að hafa fylgst með rifrildum kvölds og morgna, grátköstum og almennu uppnámi hinum megin við vegginn heyrðum við í morgun rætt um skilnað. Eitt af fáum skiptum sem við höfum heyrt orðaskil en vonandi bara að blessuðu fólkinu líði betur í sundur en saman og við hættum að sofna og vakna við orðaskakið.
Í öðrum fréttum er að það hefur snjóað látlaust í heilan klukkutíma í morgun! Já og varla talað um annað í sjónvarpinu. Skólar lokaðir, þar á meðal leikskólinn hans Atla, og umferð gengur hægar en venjulega. Og svo heldur bara áfram að snjóa! Við Atli erum náttúrulega svo snarbiluð að við ætlum að hætta okkur út í þetta veður bráðum, í snjóbuxum og úlpum og Atli með lambhúshettuna sem ameríkanarnir furða sig heilmikið á (virðast aldrei hafa séð álíka flík og finnst hún meiriháttar) og sjá hvort við lifum það af. Læt vita.