Slökkviliðsæfing

Slökkviliðsmaðurinn hefur verið á námskeiði um nokkurt skeið núna og hefur það þess vegna bara gott með frí öll kvöld og helgar (sem fara reyndar að mestu í að lesa og gera verkefni). Hins vegar er ekki laust við að hann sakni hasarsins úr starfinu sem má glögglega sjá á því hvernig hann mænir á eftir sjúkrabílum sem hann sér þeysa fram hjá á fleygiferð með bláu ljósin kveikt. Ég ákvað (frekar ómeðvitað reyndar) að bæta honum þetta aðeins upp í gærkvöldi þegar ég var að elda og skapa smá hasar á heimilinu. Var að hita brauð í ofninum og setti grillið á og náði að láta bökunarpappírinn rekast í grill-elementið þannig að pappírinn skíðlogaði að sjálfsögðu. Kallaði svo: "Ó, ó, Andri! Það er kviknað í!" Það var eiginlega verst hvað hann var pollrólegur á meðan hann tók ofnskúffuna og setti hana undir kranann.